علم، معتقد ام خدعه؟

احم احم.. هو بس في مقدمه كدا شبه موضوع مستقل بعني بس مهمم جدا ف لو مش حابب تقراها انزل تحت شويه هتلاقي عنوان احمر كدا ده الموضوع لو هتعدي المقدمة.
فالاول بس هتكلم عن حاجه اسمها.. موسيقي حماسيه فالخلفيه.. العلوم الباطنيه
الاسم يبان مهم ومريب كدا بس هو فعلا كدا بس هبسطهالك بصوت هاني رمزي
ما هي العلوم الباطنيه؟ هي علوم باطنيه.. هاها
علوم اندثرت.. علوم راحت عليها مش عشان هي مش مفيده بالعكس نقدر نقول عشان طلعت ناس قالت ايه ده يعع علم بيدور فالاساسيات لا حرام ابعدوا عنه.. زي بالظبط اللي بيحصل دلوقتي ساعات فالفيزيا والكيميا والبيولوچي ولولا سطوة وقوة المجتمع العلمي فالوقت الحالي كانت العلوم الاساسيه دي بقت علوم باطنيه برضه.. طيب فهمنا انها نوع من العلوم حقيقيه بقي خرافيه بتدعو للإلحاد بتدعو للرقص البلدي المهم انه نوع علم له منهجه وتاريخه وعلمائه كمان بس اندثرت
مثلا.. المسيحيه الحره.. الصوفيه..البوذيه..السحر..الفلك.. في ناس بتقول علي دول الدرب الذي لا يخطأ او الشفاء. بس دول يا عمو ديڤ مندثروش.. حقيقي صح.. بس شوف بيتواجهوا ازاي وبيتحاربوا ازاي..
لو دخلنا ف تاريخها واصولها هنحتاج مراجع وممكن يبقي ده موضوع لوحده ولو فعلا شاددكوا يعني اكتبولي فالكومنتات..
في بقي حاجه اهم ان اهم الجمعيات والاخويات السريه في العالم كانت بتناقش العلوم دي واهم العلماء والمفكرين في العالم برضه كانوا باحثين في العلوم الباطنيه.. المهم ان من قراءاتي من مصادر كتير كدا استشفيت ان ف كل علم باطني لازم تظهر حاجه كدا كلنا بنخاف منها او الاصح اقول مش فاهمنها حاجه اسمها الماسونيه بيبقي اما تاريخها ليه علاقه بالماسونيه. اما اتحدت بيها ف وقت من الاوقات. اما حد مهم مثلا باحث فالعلم ده كان ماسوني ورأيي الذي لا يعني شئ بيقول ان يمكن تكون الماسونيه اتعملت اصلا عشان تحمي كل دول تحمي العلوم الباطنيه وتخليها ف ذاكرة ابتاريخ علي قد ما تقدر وده اللي يفسر برضه ازاي كيان الماسونيه بيتهاجم من كل فئات العالم حتي من غير ما نجرب نقرا عنهم او عن تاريخهم او نفهم. استفدت ايه من المقدمة؟
استفدت اقول ان العلوم الباطنيه حقيقيه وقدامنا 24 ساعه
بس انا هاخد حاجه واحده بس من اللي ذكرتهم
موسيقي حماسيه تاني فالخلفيه
*الخيمياء:
غالبا في ناس هتقفل الموبايل وتدخل تنام دلوقتي بس هتتفاجئوا كمان حبه
الخيميائيه هي: علم باطني قديم جدا قدم الدوله المصريه الفرعونيه..
هو ايه.. علم بيبجث ف اصول المواد.. يعني الكيمياء الحديثه لقت العناصر وحطتها ف جدول وكل العظمه دي.. الخيميائيه بقي بتدور ف ورا العناصر دي.. وبتتشهر بأنها توصلت انها تحول الرصاص لذهب.. ده الكلام اللي هتقروه وهتسمعوه ف كل حته.. يللا نسأل
ايه اصلها زمانا ومكانا وفكرا؟
نقدر نقول انها نتاج بين الكيمياء الصينيه القديمه والمصريه القديمه . صعب نوصل لخيط محدد بعينه ونقول هو ده لكن اغلب المراجع بتقول ان الكيمياء الصينيه والمصريه القديمه كانوا تقريبا شبه بعض وعاملين شغل جامد يعني . بس لو وصلنا لنقطه بعينها فالخيمياء اصلها صيني مصري قديم ويمكن مصري اكتر كلنا عارفين قد ايه الحضاره الفرعونيه شالت اسرار عمرنا ما هنعرفها لكن ف كل اكتشاف عل مر السنين بنعرف اكتر قد ايه المصريه القديمه كانت وهتفضل رقم واحد فالكيميا بدليل التركيبات اللي لحد دلوقتي مش عارفين نوصلها ولا نوصل حتي لخاماتها من غير النسب زي التحنيط وحفظ الالوان كل القرون دي وغيره.
ركزوا.. فيه كاتب صيني قديم ف 330 ق.م اتقال عنه ف كتاب اثري الكلام ده "حرّر عن الفلسفة التاتوئية والسيمياء. والأخيرة تحتوي على كيفية تحويل المعادن إلى معادن ثمينة، وكيفية الحصول على إكسير الحياة، تلك المادة التي باعتقادهم تطيل الحياة وتمنع الموت"
افتكروا بس كلمة إكسير الحياه دي
ندخل عالحضاره الاسلاميه.. ابن النديم قال "زعم أهل صناعة الكيمياء، وهي صناعة الذهب والفضة من غير معادنها، أن أول من تكلم عن علم الصنعة هو هرمس الحكيم البابلي المنتقل إلى مصر عند افتراق الناس عن بابل، وإن الصنعة صحّت له، وله في ذلك عدة كتب، وإنه نظر في خواص الأشياء وروحانيتها"
محدش فينا ميعرفش الرازي.. عالم جليل.. قال ايه الرازي.
الخيميائيين هم جماعة من الفلاسفه عملوا في الكيمياء مثل: فيثاغورس وديموقواط وأرسطاليس وجالينوس وغيرهم، ولا يجوز أن يسمى الإنسان فيلسوفاً إلا أن يكون له علم بالخيمياء.
ليه حبت الشواهد دي عشان اقولكوا اننا بنتكلم عن حاجه حقيقيه مش خرافه..

الخيمياء حرفيا..
نيجي للكيمياء القديمه. الكيمياء اصلا بتتكون من كلمتين تطورهم هما solve et coacula ترجمتهم الفصل والوصل.. الفك والربط.. الهدم والبناء. لاحظوا ترتيب الافعال.
والمصطلح ده فالمعامل القديمه كانت بيتقال بمعني انه قم بالإذابه ثم التخثير.
وفيه مراجع بتقول ان ال ك وال خ تقريبا حرف واحد هو مجرد الزمن غير الكلمه او اصلا الخيمياء ظهرت قبل الكيمياء المهم ان تقريبا الكلمتين ترجمتهم واحده. ولو مش واحده فالمعني المقصود بيهم واحد.
فيه نظريه تانيه بتقول ان اصلها chumiea ودي كلمه يونانيه معناها الصهر وعلماء تاني رجعوا الكلمه ل الكلمه الفرعونيه (كمت سمت) معناها الارض السوداء.. كانت مصر بتتسمي ف عصور متفرقه بالارض السوداء لارتباطها الشديد بالسحر وفيه علماء تاني رجعوها للكلمه العربيه كمي/يكمي ومعناها يخفي او يستر والرأي ده بيدعموه ب ان الخوارزمي قال ف كتابه مفاتيح العلوم الاتي
"اسم هذه الصناعة، الكيمياء، وهو عربي، واشتقاقه من، كمي يكمى، إذا ستر وأخفى"
فهمنا زمانها ومكانها.. اهدافها.. اتذكر ف كتب كتير اغلبها من الحضارات الاسلاميه انه:
1 تحويل مختلف المعادن الي ذهب. (الكريسوبويا)
2 علم (السباچيريك) او الفضه وغرضه برده شبه الاول.
3 إنتاج.. إكسير الحياه.. ايه بقي قصته ده!!
إكسير الحياه ده كان غرض كل الخيميائيين اللي ظهروا علي وش الارض اننا نوصل لعنصر ابدي يبقي قادر يعطي للإنسان المحدود الفاني طاقه تخليه ابدي وتديله حياه ملهاش نهايه وخاليه من الامراض وبالتالي يكون الانسان وصل لقمة (هرمه) المعرفي انه بقي الإله الشخصي لنفسه. فضلوا بقي يحطوا ده علي ده ونحول ده ونغير ده ومش عارف نزود ايه 'بكره الكيمياء'.
المهم قام ايه بقي .. موصلوش لحاجه.. (متاخدوش ده كإجابه هنفهم ليه)
بس العلم ده كان قائم و ف فتره من الزمن كان اشهر من اي حاجه تانيه اللي هي فترة النهضه الاوروبيه بعد ما بدأوا يترجموا كل علوم المسلمين لقوا مفيش كتاب كيميائي إلا وذاكر فيه الخيميائيه علم عبقري قدم الطب كتير اوي قدام و اكتشافات كتير جدا ف مجالات مختلفه. المهم..
الفاتيكان تسكت، لا؟ الفاتيكان حرم الخيميائيه.. حرم كل المسيحيين من دراسة الخيميائيه والدخول في جامعاتهم السريه واللي هيعمل غير كدا هو برا الدين.. كعادة الڤاتيكان قالت ده علم شيطاني حديث خارج من كتب شيطانيه قديمه جدا غرضها الإلحاد والمش عارف ايه والتطاول علي قدرة الإله وحفله كدا. طب ليه يا ڤاتيكان حرمتيه ليه ومفيش إثبات واحد بيقول اللي انتي بتقوليه ده ؟ هل خفتي؟ بس هتخافي من ايه.......
إلا لو هو فعلا حقيقي واكتشف حاجه تخوف سيطرتك وسطوتك ؟؟؟
لو حابين نبرر موقف الڤاتيكان بصراحه يعني. ان فعلا الخيميائيه كانت علم رمزي جداا كله رموز وخزعبلات كدا ورق الكتب بتاعته تحسه كدا بيخوفك ورسومات مش مفهومه وخط كبير وصغير وتنقل من لغه للغه وحرف لاتيني علي رقم عربي علي رمز هندي علي كلمة فرعونيه.. تحسها طلاسم وده اللي قالوه انه سحر اسود جديد وده اللي معروف لحد دلوقتي .. بس ده علم غرضه جعل الانسان إله انت متخيل عظامته اكيد مش هيكتب معادلاته واسراره ف كتب اطفال يعني كان لازم علمائه يعملوا كدا عشان يحافظوا علي سره!
لكن من اشهر الحاجات اللي اتقالت عن الاعتقاد ده كان المؤرخ لورانس بريينسبي
"ربما يكون معظم القراء على دراية بالعديد من الادعاءات الشائعة حول الخيمياء - على سبيل المثال ... أنها أقرب إلى السحر، أو أن ممارستها سواء في ذلك الوقت أو الآن هي مضللة. هذه الأفكار عن الخيمياء لم تظهر سوى خلال القرن الثامن عشر أو قبله. على الرغم من أن تلك الأفكار قد تحتمل بعض الصحة ضمن سياق ضيق، إلا أن أياً منها لا يمثل وصفًا دقيقًا للخيمياء بشكل عام."
ف عشان كدا مقولتش انهم موصلوش لحاجه لأننا منعرفش فعلا وصلوا ولا لا.. ولو وصلوا هل ده اتدون ؟ هل اصلا وصلنا؟ هل لسه عايش؟ مليون سؤال وسؤال.
نرجع تاني لقصتنا وصلنا ان الخيميائيه علم حقيقي مندثر آمنت بيه كل الحضارات واشتغلت عليه لحد ما الڤاتيكان جابه الارض..
في ناس ارائها ان سر الخيميائيه في تحويل الرصاص لذهب او المعادن العاديه لمعادن اعلي هي مجرد رمزيه بحته عن تحويل الهيئه الماديه لطاقه لاماديه.. تحويل كوكب زحل (رمز الرصاص) للشمس (رمز الذهب) وغرضها تحقيق الخلود لكوكب زحل علي حسب الاعتقادات القديمه كلها وده برضه ميغيرش معني ان الخيميائيين بحثوا عن الكمال للمحدود.. الابديه للفاني. لو شفناها بشكل اعمق شويه ممكن يكونوا الخيميائيين غرضهم بس التطور الداخلي للانسان.. يمكن اصلا مكانتش الدعوة للكمال او للالحاد بالعكس دعوه للقرب من الاله اكتر نشوف الله ده فين مننا ونقربله ونتمثل بيه.. القرب منه.. القرب من الكمال.. اتمني تقروا اخر جزء ده مره كمان
هننقل لجزء تاني برضه مريب جدا اسمه.. حجر الفلاسفه..
اساطير كتير احاطت الخيميائيين ليها علاقه بالشئ المسمي بحجر الفلاسفه.. ايه بقي حجر الفلاسفه ده.
نقدر نقول انها كانت مركز ابحاث الخيميائيين.
كل كتبهم القديمه بتتكلم عن حاجه اسمها كدا.. ده رمز بقي للمعرفه الخفيه.. الحجر ده مكتوب فيه سر تحويل الرصاص لذهب.. اسطوره اصلا فعلا ملهاش اي لازمه ومجرد عظه قصصيه.. مش عارفين!
المهم ان مجرد ما انتشرت الابحاث عن حجر الفلاسفه ده وحقيقته الاضطهاد زاد جدا عليهم مثلا البابا بوحنا الثاني والعشرون ف 1317 قدم مرسوم بيصرح فيه بتزييف الخيميائيين وبيحرمهم وبيحرم اعمالهم.
الملك هنري الربع ملك إنجلترا عام 1403 حظر ممارسة الخيمياء تماما.
في اواخر القرن الرابع عشر انتشرت لوحات بتسئ للخيميائيين علي هيئة لصوص.
علي النقيض كان الامبراطور رودلف الثاني في القرن السادس عشر بيرعي جدا اهتمامات الخيميائيين وخصص ليهم مكان لأبحاثهم في قصره.
في التاريخ معروف ان الخيميائيه ليها فضل كبير علي الطب فالتركيبات الدوائيه زي ما اتكتب عنها كتير فالسحر والاعمال السفليه وغيره بس الاشهر المشروبات الروحانيه كانوا بيعملوا تركيبات تتشرب لأغراض شفائيه ومحدش عرف حقيقتها فعلا.. كان اشهرها حاجه اسمها (أكوا فايتا) او ماء الحياه. مش مكتوب عنها كلام كتير لكن ف رأيي يعني غالبا ف نفس الوقت اللي اتشهر فيه الاكوا فايتا ده اتشهر الماء االمقطر في اوروبا جدا وممكن يكونوا نفس الحاجه.
الخيمياء لحد دلوقتي مش ظاهرلها حقيقه واضحه.. هل هو دين.. إتجاه فكري، علم خرافي، خدعه شيطانيه، كان رأي ف فتره واتشهر وراح لحاله. حقيقة العالم ده نفسه؟
علماء كتير وخيميائيين ذات نفسهم موصلوش لحقيقة الخيمياء لكن وصلوا انها ممكن تكون حاجه من الاتنين
1 علم بيسعي للكمال والابديه وبيسعي لحجر الفلاسفه اللي بيحول الرصاص لذهب او بيدي الانسان حياه ابديه من غير اي امراض وبيسعي وراء جعل الانسان إله نفسه والوصول لقمة الهرم المعرفي وجعل كل ما هو محدود ومادي لامحدود ولا مادي ومافوق.
2 هو علم رمزي بحت، غرضه الاول والاخير الوصول للذات الحقيقيه داخل الانسان. علم النفس الحديث بيصرح بحاجه شبه كدا ان الانسان السليم والصحيح النفسي هو اللي واصل لأعماقه بشكل كامل.. كامل ف نفسه..واصل للكمال بذاته. وبالتالي قادر يتعامل مع الله او مع القوه الأعلي منه ومع اللي حواليه بمختلف طبقاتهم.
غرضها فقط البحث عن الله داخلك والتوحد والاتحاد بيه.
وهتلاقوا اثباتات بالهبل عالرأي ده واثباتات اكتر كمان عالرأي التاني.. وحقيقي مفيش حاجه تقدر تجزم لينا ان رأي واحد هو اللي صح وهعرض شوية امثله علي ناس فكرت بالاسلوب ده.
كزوسيموس بانوبوليس، خيميائي.
نطر للخيميائيه علي انها تجربه روحيه كامله وان كل المواد والمعادلات مجرد رموز ودلالات لحقيقة هذا الفن. واعتبر ان كل تغير الهيئات والتطورات دي هي رموز لتحولات الانسان المختلفه ف حياته والنضوج والتطور بذاته لحد ما يوصل للذهب من الرصاص..
ممكن نسميه نضوج. حب الله. غرض وجوده وحقيقته. رسالته. ايا كان اسمه بس معناه واخد فالاخر . وقال ان وكان غرض وضع العلم ف صوره رمزيه معقده كدا هو ان منهج الفن او العلم او الرحله دي كانت مخالفه لكنيسة القرون الوسطي (مخالفه لكنيسة القرون الوسطي مش الكنيسه). لأن ببساطه لو كانت اتقالت بصراحه وبوضوح كانت اختفت تماما وكل روادها كانوا اتقتلوا بتهمة التجديف والالحاد وغيره. وكان الفن او العلم ده اختفي ومحدش سمع عنه.
و ده توضيح الكريسوبويا اللي قولنا عليها ان زي ما الرصاص ممكن يتحول لذهب.. ممكن الانسان يصعد ويطور من نفسه الدنيا الشهوانيه لحقيقته الساميه والاعلي اللي وضعه الله عليها في قمة هرم الخليقه.
موضوع واحد او رأي واحد زي ما ناس فهمته انه دعوه للكفر بالله وانه علم معمول للسحر الاسود والباطنيات وغيره. ناس تانيه شافته انه وسيله لمعرفة الاله والوصول بالذات لأحسن صوره ممكنه.
ودور حجر الفلاسفه فالكطريقين يأما هو العلم اللي هيثبت عدم وجود الخالق وجعل الانسان إله، او يطلع هو المنهج الروحي اللي يوصل الإنسان لروح الله والقرب الكامل من الكمال نفسه والمنهج اللي يمشي عليه عشان يطور الدنيوي للعلوي.
من المبهر جدا اكتشاف قرب منهجية الخيميائيه من الرموز والاسرار الباطنيه للماسونيه.. لأن اهم جمل الماسونيه واشهرها علي الاطلاق هو النظام من الفوضي ordo ab chao .. ترتيب الافعال وتكوين الجمله يشبه اوي تفسير كلمة خيمياء. الاحلال بعده التركيب.. الفوضي بعدها النظام.
للتوضيح اكتر كارل يونغ (باحث وعالم نفس) اكتشف برضه ان باطنية الكيمياء ما هي إلا منهج روحي للتدرج بالتطور الذاتي للشخص. ستيڤن هولر أكد علي الكلام ده وكرره تاني.
كمل يونغ ابحاثه و قال ان الخيميائيه بتشبه جدا اليوجا الغربيه وانها اقرب للديانات الغربيه بفلسفتها اللي فيها حريه اكبر من الديانات الغربيه وتقاليدها.
ورأيي ان حقيقة الدين ف حرية العلاقه بالله مش بالقيود.
ف رأيي برضه ان نقدر تقول ان الخيميائيه هي باطن الوصول لله بغض النظر عن دينك.
وفي تفسير صوفي عظيم اتكتب ف كتب التاريخ الاسلامي عن مراخل التطور الخيميائي:
1 نيجريدو. الاسوداد. التعفن :
باين من الاسم ان المعدن او الشخص بيوصل لاسوأ حالاته وبيبتدي يفك من تكوينه. بيوصل لقمة فساده. طبيعته مبتبقاش هي بتبقي اسوأ شئ ممكن يوصله.
2 البياض او التبييض (الانثي. القمر) : تنقية الشوائب. يبتدي المعدن او الشخص يسمي من عفنه ومن قاعه ويتبيض ويتحول لصوره أبهي من صورته الاصليه.
3 سيترينيناس، الاصفرار .(الذكر. الشمس):
التحول للذهب والرجوع للشمس
4 اخر مرحله هي الاحمرار او ال روبيدو. الزواج. :
الاتحاد مع الاله.
وانا بكتب الجزء ده افتكرت رحلة العالم الاخر للفراعنه كنت محظوظ اني اتحط ف بحث تفصيلي للرحلة الرائعه دي واتضح انهم كانوا عاملين بعد موجي ولون لكل بوابه من ال 12 بوابه اللي بيعدي عليهم الفرعون المتوفي للوصول للعالم الاخر والاتحاد ب رع إله الشمس الاكبر (الاصفر والاحمر) وكانت اولي البوابات مظلمه تماما اللي هي اول بوابه بعد باب القبر او الهرم (الاسوداد، التعفن).
وفالمعارف الصينيه القديمه في رموز كتير بتشير لنفس التنور والتحول تقريبا مع اختلاف التفاصيل.
فالتحليل الصوفي اتذكر ان مرحلة الاحمرار دي هي مرحلة التزاوج الكيميائي اللي بيتم فيها انتاج الزئبق وهو العنصر الرئيسي لتكوين حجر الفلاسفه.
كل ده بيتسمي ماجنام اوبي او العمل العظيم.
فضلت الخيمياء عايشه بعد هدوء ثورة الفاتيكان بفضل علمائها في القرن ال 17 وال 18 ، مثل : روجر بيكون، والقديس توما الأكويني، وتايكو براه، وتوماس براون، وبارميجيانينو. لحد ما ظهر ف اواخر القرن ال 18 علم الكيمياء الحديثه اللي اتميز بدقته ومنهجيته ف اتجه العلماء كلهم ليه وبدأ العلم ده يتخصص فالماديه العقلانيه المتعلقه بالكون ويبعد عن خرافات الكمال او الرمزيه لتطور الانسان وما يشبهه.
اخر جزء انا هذكر فيه كتاب الخيميائي الشهير ل باولو كويلو ف لو مهتم تقراه وانصحك جدا متقراش الجزء ده عشان محرقش الروايه.
الروايه بتتكلم عن رحله لشاب بغض النظر عن تفاصيلها لكن ف اخر الروايه الكاتب بيذكر ان لما الشاب وصل لمكان الكنز اللي اتوعد بيه اللي هو المفروض حجر الفلاسفه لقي نفسه عند الشجره اللي بدأ منها الرحله.. الكاتب كان بيوضح بصوره عظيمه وعبقريه ان الكنز في الرحله ف خبراتنا وتجاربنا وفي الناس اللي كسبناهم واللي اذونا واتعلمنا من جروحهم لينا وفي الحب اللي اخدناه واديناه وفالخساير والمكاسب بأنوعها واحجاماها.
الكاتب ده فهم الخيميائيه بشكل تالت خالص .. ويمكن عشان كدا بقي علم باطني عشان بيعتمد علي تفسير الشخص المفرد 100% في زمن مش عايزين فيه غير المألوف والمحفوظ وبقي البحث بيتحرم وانك تفتح عينك علي اسرار العالم بقي كفر.
شكرا جدا لو وصلت لهنا، احب جدا تشاركني رأيك ونصايحك.
ومتبطلوش بحث 😊

تصوير يوضح ترابط الخيمياء مع الحضاره المصريه القديمه والبوذيه واليونانيه وغيرهم ووجود عين الانسان تدل علي الادراك والالوهيه.

جدول يوضح رموز الخيميائيه ومعانيها.

من المدهش التشابه بين الجدول ده والجدول الدوري للعناصر فالكيمياء الحديثه مما يدل علي ترابطهم.

احدي صفحات الكتب الخيميائيه

مربع فرانكلين

هو كود معروف ان كل الصفوف بالطول بالعرض تعطي نفس الناتج. هنفهم غرضه فالصوره اللي بعدها.

اللوحه دي لفنان اسمه ألبرخت دورير.

اتذكرت ف رواية الرمز المفقود لدان براون

وشرح دان براون العمل ده بانه بيرمز للعالم والمجتمع العلمي فالوقت اللي اترسمت فيه اللوحه ولحد دلوقتي ان العالم بيبذل كل مجهوده بس لسه موصلش لقمة هرم المعرفه ولسه معرفش حقيقته.. العناصر النجار والادوات االي عالارض والملاك الحزين بيوضحوا ده .. والمدهش ان مربع فرانكلين موجود في اللوحه عشان كدا ارتبطت اللوحه بالصهيونيه بشكل كبير وغرضها ف تطور العالم والتطلع للسمو.